Cartas recibidas

Asociación Cultural Monte Branco
O Couto-Ponteceso.

Lido o borrador do ambicioso programa da Semana das Letras Galegas eleborado pola Asociación Cultural Monte Branco, quero manifestar, en primeiro lugar, o meu asombro e admiración pola cantidade, calidade e diversidade de actos programados, que, de se levaren a cabo na sua maior parte, sen dúbida constituirán un evento importante e de difícil superación, marcando un camiño a seguir por outras asociacións culturais do país, algunhas tal vez con máis posibilidades materiais.
Como galego e bergantiñán non podo deixar de me sentir orgulloso de comprobar o dinamismo, esforzo e dedicación dunha Asociación que loita por potenciar e difundir a cultura galega, sen se esquecer de lle render homenaxe ao insigne bardo que, nacido "cabo de pinal espeso", soubo mitificar as terras de Bergantiños e proclamar "a redenzón da boa / nazón de Breogán"; e sen tampouco se esquecer dos escritores bergantiñáns actuais que, cada un no seu campo, intentan contribuír ao florecimento da nosa cultura.
Difícil resulta achar algunha caréncia relevante en tan completa e equilibrada programación, pois nela non falta a debida atención ás diferentes actividades artístico-culturais nen aos diversos sectores sociais, coa xusta atención preferente aos nenos e mozos, verdadeira esperanza para dar cumprimento á profecía pondaliana.
Considero un grande acerto dedicar un dia á nosa língua, ademais da merecida homenaxe a Bernardino Graña e a lóxica atención á figura de Rafael Dieste. Mais non o son menos as actividades lúdicas, a potenciación da imaxe, do teatro, da música, etc... Por outra parte, a activa participación de personalidades tan destacadas da nosa literatura como Neira Vilas, Manuel María, Bernardino Graña ou Méndez Ferrín xustifica por si mesma a importáncia desta Semana das Letras Galegas.
Só me cabe desexar que estes proxectos se consigan levar a cabo e que todo saia tan ben como os seus organizadores se merecen, felicitando-os pola brillante iniciativa e animando-os a seguir polo mesmo camiño en defensa da nosa língua e cultura.

A Coruña, 16 de Marzo de 1995

Xosé Ramón Freixeiro Mato