Cartas recibidas

Gres, 16 de marzo de 1995.
Sr. D. Xosé Manuel Varela Varela
Monte Branco
Ponteceso

Querido amigo:

Recibíno borrador do Programa sobre AS LETRAS GALEGAS, que, como xa é habitual, Monte Branco vai a máis na conmemoración dese acontecemento. Caso único o voso en toda Galicia. Caso exemplar.

Pides a miña opinión sobre o programa. Aparte de admirar a vosa dinámica, o voso esforzo sen par, pouco teño que observar a este proxecto. Con todo, van unhas breves notas.

Se vos é igual o meu pregón sería: "As letras galegas na emigración". Explico: hai unha literatura galega feita aquí que aborda o tema da emigración. Non é moito o que hai, pero é dabondo coñecido. En cambio a literatura feita na emigración é máis novedosa. Podería concretarse neso, é dicir, na literatura galega feita na emigración. Coincide ademais que este ano o Día das Letras adícaselle a un exiliado. Nunha palabra e concretando, mellor ca á literatura galega de tema migratorio penso que resulta máis atractivo o tema da literatura que naceu na emigración. (Todo esto se vos parece ben así. É unha simple proposta).

Día 15. Anúnciase "proxección ininterrumpida" de O camiño das estrelas. ¿E que máis? Ese documental de Chano dura coido que 30 minutos ou algo así. ¿Que quer dicir ininterrumpida? Só esto se lles vai ofrecer ós nenos, ou hai algo máis?

Na carta que me mandas aparte disme do encontro con escolares, e sinatura de libros. ¿Esto é aparte do da película de Chano dos dous colexios ou é despois, película, aparte, no centro cultural ou no propio colexio público de Corme? Se é un encontro de Anisia Miranda e Xosé Neira Vilas, como parece ser no colexio de Corme, non vexo que ese encontro apareza reflexado no programa, nin aparece a hora, non está claro. Nós estamos dispostos para un encontro nun colexio, con sinatura de libros, etc. como me dis na carta, pero como no proxecto do programa nada se di, pois non entendo.

Dia 15 no IESP: penso que á conferencia de Chano deberiades de poñerlle título. É máis concreto. Pedídello, suxiro.

De acordo en que nos recollan en Gres ás 12 do día 14-5 e que nos quedemos esa noite no hostal Monte Branco.

Explícame algo do do Araguaney o 28-4 ás 20 hs. En qué consiste. Non teño transporte, e Santiago está de Gres a só 23 quilómetros. Se algún nos recolle e nos trai de volta, iriamos, claro. Calquera dos amigos coñecidos, se é que van, pode vir: Laíño, Xerardo, Eladio... En fín, aclárame.

16 maio, 15 hs. Na Casa dos Veciños. En vez de arredor, podería dicir por exemplo "Coloquio sobre a Mostra do libro galego", ou algo así pois "arredor" coido non explica moito (ou ó mellor si, é custión de estilo. Ó mellor sobreenténdese).

En fin, só uns detalles formais, pois o programa en xeral parécenos de primeira. Digno de aplauso, coma sempre, o voso esforzo.

E nada máis. Chámame. (Boa hora entre 10 e 11 da noite) ou escríbeme en relación co exposto. Gracias.

Saúdos cordiais a Xosé María. Saudos de Anisia.

Apertas de

Xosé Neira Vilas.