Cartas recibidas

Gres, 24-3-95.

Querido Xosé María:

Para engadir ós comentarios que fixen na carta do 16-3 a Xosé Manuel, respecto do programa e do que comentaches por tf.

Paréceme que en xeral o programa está ago "encimado". Actividades de media hora que tal vez requerisen máis tempo, e que na realidade van levar máis. Sempre se estiraría, ademais, pola proverbial impuntualidade da xente. É inevitable.

O día 14 pode andar ben (anque tal vez o das 17.30 requerise algo máis de tempo para "Gume" e a presentación da exposición. En fin, todo depende de como se faga). O resto, ben.

Día 15. Na mañá habería pois, dacordo co falado, encontro de Anisia Miranda e eu cos nenos de Corme. Quero decir, en Corme, pois vexo que tamén estarán presentes os de Ponteceso. Sinatura de libros (recorda que se queren libros nenos e mestres e non hai por ahí, con Teresita do Castro -tf. 62 02 00 pódense conseguir en depósito, devolvendo os que non se vendan). Sería formidable que poidésedes levar algunhas das obras de Anisia que presentaron os nenos de Ponteceso, a Corme. Ademais do entretimento que significa, sería un acto de confraternidade entre os dous colexios, da que andamos todos tan necesitados, digo eu.

(Xa sabemos que a morte do noso amigo Chano impide a súa conferencia e que ti revertiches nunha homenaxe. Moi ben).

16-5. Vexo hai actividades simultáneas ou case (Río Anllóns, IESP). A mesa redonda do IESP no programa debe sinalarse quenes participan, incluíndo o nome do moderador.

Día 17-5. Non sei se acabaredes a misa cantada en media hora para o da ofrenda floral. En fin, tamén aquí o horario na realidade estarricaríase. E en seguida, ás 13 hs. As pracas. Todo moi xunto, penso.

Aínda que o fagan en tan pouco tempo paréceme que debías dar máis de 15 minutos para xogos cooperativos. Igual me parece apretado, se vai asistir a mesma xente ó dos escritores con presentación de libros e o da carpa. Se é outro público, non digo nada, pero anque sexan cousas ben distintas, se non son moi distantes deberías posibilitar que asistan a uns e a outros aspectos do programa. Igual que o das 20 hs. ó que seguramente queren asistir todos e queda moi cercano o Xabarín.

Do 18 nada digo en canto a horas. Si que debe decirse quenes participan na mesa redonda sobre a situación actual da lingua.

19-5. Véxoo ben en horarios e temas. Tampouco teño nada que observar respecto do día 20-5. (Vexo hai inauguración e apartura o 20 e 21 da feira da artesanía. Non está claro -para min- a diferencia de matiz).

21-5. ¿Só media hora para o concerto de gaitas? ¿E media hora para a banda? ¿Non é pouco en ambos casos? (Anque son en lugares distintos, moita xente quererá ir ós dous, penso). Debe consignarse qué poetas participan no recital.

En fín, Xosé Mª, son algunhas dúbidas e suxerencias. Ben sei que o que me mandastes é simplemente un borrador tentativo. Por eso opino, modestamente por si val de algo este meu parecer.

Unha aperta de Anisia e de Xosé Neira Vilas.